मुंबई | प्रतिनिधी :
दिल्लीतील जंतर-मंतर येथे विद्यार्थ्यांच्या प्रश्नांसाठी सुरू असलेल्या आंदोलनादरम्यान आंदोलनकर्त्यांवर झालेल्या पोलिस कारवाईच्या पार्श्वभूमीवर जनहित लोकशाही पार्टीचे महाराष्ट्र प्रदेशाध्यक्ष अॅड. शंकर चव्हाण यांनी केंद्र सरकार आणि भाजपवर तीव्र शब्दांत टीका केली आहे. सोशल मीडिया प्लॅटफॉर्म 'एक्स' (X) वर त्यांनी केलेल्या आक्रमक पोस्टमुळे राजकीय वर्तुळात चर्चा रंगली आहे.अॅड. शंकर चव्हाण यांनी आपल्या अधिकृत पोस्टमध्ये म्हटले आहे, "भाजपवाल्यांनो, यंदाचा जंतर-मंतरवरील खेळ तुम्हाला महागात पडणार." विद्यार्थ्यांवर आणि आंदोलनकर्त्यांवर झालेल्या कथित लाठीचार्जचा निषेध करत त्यांनी लोकशाही मार्गाने आंदोलन करणाऱ्या युवकांचा आवाज दडपण्याचा प्रयत्न होत असल्याचा आरोप केला.अॅड. चव्हाण यांनी म्हटले की, देशातील लाखो विद्यार्थ्यांचे भविष्य पणाला लागले असताना त्यांच्या प्रश्नांना उत्तर देण्याऐवजी त्यांच्यावर पोलिसी बळाचा वापर करणे हे लोकशाहीला शोभणारे नाही. विद्यार्थ्यांच्या न्याय्य मागण्यांकडे दुर्लक्ष करून दडपशाहीचा मार्ग स्वीकारणारे सरकार जनतेच्या विश्वासाला तडा देत आहे, असा आरोपही त्यांनी केला.ते पुढे म्हणाले की, विद्यार्थ्यांचे आंदोलन हे कोणत्याही एका व्यक्तीचे किंवा संघटनेचे नसून देशातील तरुणाईच्या भविष्याशी संबंधित आहे. युवकांच्या आवाजाला लाठ्यांनी दाबण्याचा प्रयत्न झाला तर त्याचे राजकीय परिणाम निश्चितच भोगावे लागतील. "विद्यार्थ्यांच्या हातात पुस्तके असायला हवीत; लाठ्या नव्हे," असे त्यांनी नमूद केले.सोनम वांगचुक यांच्या नेतृत्वाखाली सुरू असलेल्या आंदोलनाचा उल्लेख करत अॅड. चव्हाण यांनी सांगितले की, आंदोलनकर्त्यांनी केंद्रीय शिक्षणमंत्री धर्मेंद्र प्रधान यांच्या राजीनाम्याची मागणी केली आहे. या पार्श्वभूमीवर त्यांनी आपल्या राजकीय भूमिकेतून पंतप्रधान नरेंद्र मोदी यांनीही नैतिक जबाबदारी स्वीकारून राजीनामा द्यावा, अशी मागणी केली.अॅड. चव्हाण यांनी सरकारवर टीका करत म्हटले की, "विद्यार्थ्यांच्या भविष्याशी खेळणाऱ्यांना जनता कधीच माफ करणार नाही. सत्तेच्या जोरावर आंदोलन दाबण्याचा प्रयत्न म्हणजे लोकशाहीची गळचेपी आहे. भारताचा युवक जागा झाला आहे आणि तो अन्यायाविरुद्ध संविधानाच्या चौकटीत राहून लढत राहील."त्यांनी पुढे म्हटले की, शिक्षण व्यवस्था ही कोणत्याही राष्ट्राचा कणा असते. जर परीक्षा प्रणालीवरील विश्वास डळमळीत झाला, तर त्याचा परिणाम संपूर्ण देशाच्या भविष्यातील पिढीवर होतो. म्हणून विद्यार्थ्यांच्या मागण्यांकडे राजकीय चष्म्यातून न पाहता संवेदनशीलतेने पाहणे आवश्यक आहे.जनहित लोकशाही पार्टी विद्यार्थ्यांच्या न्याय्य हक्कांच्या बाजूने ठामपणे उभी असल्याचे सांगत अॅड. शंकर चव्हाण यांनी स्पष्ट केले की, आंदोलनकर्त्यांवर बळाचा वापर करण्याऐवजी सरकारने संवाद साधून प्रश्न सोडवावेत. अन्यथा देशभरातील युवक आणि विद्यार्थी आगामी काळात लोकशाही मार्गाने अधिक तीव्र आवाज उठवतील, असा इशाराही त्यांनी दिला.अॅड. चव्हाण यांच्या या आक्रमक भूमिकेनंतर त्यांची पोस्ट सोशल मीडियावर मोठ्या प्रमाणात व्हायरल होत असून विविध राजकीय पक्ष, विद्यार्थी संघटना आणि सामाजिक कार्यकर्त्यांकडून त्यावर प्रतिक्रिया उमटत आहेत.
**********
0 Comments